መንፈስ ቅዱስ ለነፍሳችን ሕይወት እየሰጠ በጸጋ ወዳለው መዳን ይመራናል፤ ይህ ቸር መንፈስ በኢየሱስ የተሰጠንን ይህንን ተስፋ ያረጋግጥልናል፣ በድካማችን እየደገፈ ከባድና ተስፋ አስቆራጭ ሁኔታዎችን እንድናልፍ ያደርገናል። 

በየዓመቱ ገናን ስናከብር እንደማንኛውም ሌላ በዓልና የእረፍት ጊዜ ብቻ አናስበው፤ እንደመደበኛ ልደትም አንቁጠረው። ወንድሞችና እህቶች፣ የምናከብረው አምላክ ሰው ሆኖ በእኛ መካከል ማደሩን ነው! የምናከብረው ለዘመናት የተሰጠውን ተስፋ ፍጻሜ ነው። 

እንደ አዲስ እናት የ6 ወር ልጄ ነገሮችን ለመያዝ፣ ለመገለባበጥ ሲሞክር፤ እንቅልፉ ሲመጣ ሲነጫነጭ... እያየሁ ኢየሱስ ልክ እንደዚህ ሕጻን ሆኖ በመካከላችን ማደሩን እያሰብኩ እደነቃለሁ። በመጀመሪያ የነበረውና በእግዚአብሔር ዘንድ የነበረው ቃል እንደአንድ አቅም የሌለው ሕጻን ሆኖ ወደኛ መጣ - እንዴት አስደናቂ ነው!